حول علاقته السابقة بالفنان محمد رمضان وكيف كان جزءًا من بداياته الفنية في مجال الغناء، قال حسين غاندي: "محمد رمضان باعني بعد ما علمته الغناء، ومش هاغني معاه تاني لأنه مش هيفيدني."
وأضاف غاندي في تصريحاته: "محمد رمضان، مع كل احترامي له، مكانش بيتحرك خطوة إلا لما كان يكلمني الأول. كنت أقف معاه قدام المايك وأقوله قول كذا، يقولي حاضر. في الوقت ده، أمي نفسها مكنتش تعرف مين محمد رمضان." وتابع: "محمد كان بيكلمني نص الليل، وكنت أقول لمامتي ده اللي عامل كذا وكذا، لكن لما نجح، مبقاش يرد عليا."
وكشف غاندي أنه كان جزءًا من بدايات محمد رمضان الغنائية: "أنا اللي علمته إزاي يقف قدام المايك وأقوله يعمل إيه. كمان إنستجرام بتاعه أنا اللي عملتهوله لأنه مكانش يعرف يعني إيه إنستجرام. عندي إثباتات وفيديوهات تثبت كلامي."
وأكد غاندي أن محمد رمضان تغيّر بعد نجاحه: "بعد ما بدأ يقف على رجليه، مردش عليا. كنت جزءًا صغيرًا في مشواره، مش هقول جزءًا كبيرًا، لكن جزءًا مؤثرًا. دلوقتي مش هيضيفلي، أنا أخدت المرحلة دي من بدري."
وفي المقابل، أشاد غاندي بتجربته مع النجم مصطفى شعبان قائلاً: "اشتغلت معاه في 7 مسلسلات ناجحة، وهو دايمًا بيرد عليا لحد دلوقتي وبيسأل عليا. الفرق واضح."
ويفجر مفاجأة حول سرقة الألحان في المهرجانات:
أطلق غاندي تصريحات مثيرة للجدل، حيث تحدث عن نجاح الفنان حسن شاكوش وسرقة الألحان في الوسط الفني الشعبي. وقال غاندي: "حسن شاكوش مكنش معروف في البداية، احنا كنا وش الخير عليه، وغنى معانا في البداية أغنية (كله يسكت اسمعوا)، واللي نجحوا ربنا وبعدها أنا. فيجو اللي أقصده مش فيجو الدخلاوي بتاع إسكندرية، ده فيجو مدينة السلام موزع مميز."
وأضاف غاندي أن الساحة الفنية مليئة بسرقة الألحان قائلاً: "كل اللي في المجال بيسرقوا الألحان إلا أنا، وواقف لوحدي وناجح لوحدي بعد ربنا وبدعوات أمي." ووجه اتهامات مباشرة لثلاثة من أبرز نجوم المهرجانات: "شاكوش، حمو بيكا، وعمر كمال أكتر ثلاثة بيسرقوا الألحان، وكل أغانيهم مسروقة."
واختتم غاندي تصريحاته قائلاً: "أنا في العشرة اللي بينافسوا على الساحة، لكن في نظر نفسي أنا رقم واحد."