نشرت الفنانة آيتن عامر عبر صفحتها الشخصية على موقع التواصل الاجتماعي إنستجرام مجموعة من الصور تجمعها بوالدها الراحل، مرفقة بتعليق صادق ومؤثر يعكس مشاعر الحنين والفقد.
وعبرت آيتن عن افتقادها الكبير لوالدها قائلة: "وحشتني أوي.. الدنيا مش حلوة يا بابا، ولا الناس كمان. كل مرة أتعرض لاختبار صعب أو أزمة، بييجي في دماغي أول واحد.. أنت. وجودك كان هيفرق أوي."
وأضافت الفنانة: "يمكن عمري ما قلت إن غيابك مسببلي أزمة كبيرة، لكن هييجي يوم وأبقى قوية كفاية أواجه وجع قلبي وأطلع كل الكلام اللي جوايا ومقولتهوش. زعلانة منك في حاجات ومفتقداك في حاجات أكتر بكتير. متأكدة إن لو كنت موجود كنت هتبقى السند، لكن غيابك خلاني أنا السند لنفسي وللي حواليا كمان، لأن فيا منك كتير خصوصًا قوتك وجدعنتك."
وأكملت آيتن عامر: "أنا تعبت من كتر القوة، ومبقاش عايزة أدخل حروب ولا مشاكل. اللي عايز يفهم حاجة يفهمها، واللي عايز ياخد فكرة ياخدها.. مش هبرر ولا هدافع. بس اتطمن.. بنتك قدها، ومهما قابلت هتفضل واقفة ورأسها في السما، هتاخد استراحة محارب، وعمرها ما هتبدأ حروب، بس دايمًا هتكون مستعدة لأي حاجة، وساعتها مش هيكون في احتمالية للخسارة."
واختتمت الفنانة رسالتها بكلمات مؤثرة: "بحبك ووحشتني وزعلانة منك، وجوايا وجع كبير، بس مش هقولك غير كلمة واحدة.. اتطمن.. بنتك قدها ♥️".
وأشارت إلى أن الصورة التي نشرتها أصبحت ترندًا على مواقع التواصل الاجتماعي في اليومين الماضيين، مؤكدة أن ما كتبته يعكس مشاعرها الحقيقية وأن لديها الكثير من الصور التي كانت تتمنى أن يشاركها والدها فيها.
