أثار نجم الكرة المصرية السابق مصطفى يونس الجدل مجددًا، بتصريحات نارية هاجم فيها سياسة النادي الأهلي في التعاقدات، مؤكدًا أن ما يحدث حاليًا لا يُمثل المبادئ التي تربى عليها أبناء النادي، وعلى رأسها احترام المنافسين وعدم تدمير الأندية الأخرى.
مش بدوّر على التريند.. اسمي لوحده تريند
وقال مصطفى يونس خلال الحوار: "أنا مش بدوّر على التريند أو الشو، أنا اسمي مصطفى يونس، والاسم ده لوحده تريند.. أنا ابن الأهلي وابنه البار، ولا حد يقدر يشكك في ده".
وأضاف: "اتعلمت من الكابتن صالح سليم يعني إيه حب الأهلي.. حب النادي مش حب المصالح، وكل اللي بيغلط عمره ما هيقول أنا غلطت، لا المرتشي هيقول، ولا اللي بيسمسر هيعترف، ولا اللي بيسرق هيعترف".
قلت للخطيب وحسن حمدي: عيب
تابع نجم الأهلي السابق حديثه قائلاً: "أنا قلت للكابتن محمود الخطيب والكابتن حسن حمدي (عيب) على حاجات كتير، سواء في التعاقد مع بعض اللاعبين، أو العقود المبالغ فيها لبعض اللاعبين، لكن لا حياة لمن تنادي".
الأهلي فرّغ الأندية
وأطلق مصطفى يونس واحدة من أكثر تصريحاته إثارة للجدل، حين قال: "اللي بيعمله الأهلي حالياً في سوق الانتقالات غير مقبول.. الأهلي فرّغ الأندية، وده مش من مبادئنا اللي اتربينا عليها".
في إشارة واضحة إلى سياسة ضم اللاعبين المميزين من الأندية المنافسة، وهو ما اعتبره البعض "إضعافًا للدوري" وتهميشًا للمنافسة.
