كشفت الفنانة يسرا خلال الندوة الخاصة بالمخرج الراحل يوسف شاهين ضمن فعاليات مهرجان الجونة السينمائي، عن جوانب إنسانية وفنية مميزة في شخصية المخرج الكبير، مشيرة إلى أن تأثيره على الممثلين الذين عملوا معه كان طاغيًا ولا يمكن نسيانه.
وقالت يسرا: "أي فنان يشتغل مع يوسف شاهين بيتأثر بيه جدًا، تأثيره بيكون طاغٍ لدرجة إن بعض الممثلين ممكن يظهروا بطريقة مختلفة عن طبيعتهم، لأنه كان عنده قدرة غير عادية على إخراج طاقات الناس اللي حواليه."
وأضافت: "يوسف شاهين كان بيحب الممثلين جدًا، وكان يقف ورا الكاميرا بنفسه علشان يلقط مني التعبير اللي عايزه، من غير ما يطلبه بشكل مباشر. كان يعرف يوصلنا للحالة اللي في دماغه من غير ما يخلينا نسخة منه، وده الفرق بين التأثر بيه والتقليد."
واستعادت يسرا أحد المواقف الطريفة والمميزة التي جمعتها به أثناء تصوير فيلم «حدوتة مصرية»، قائلة: "مكنتش فاهمة الفيلم خالص، ولما قلت له مش فاهمة، قالي بمنتهى العفوية: انتي حمارة!.. ضحكت جدًا وقتها، لكنه بعدها شرحلي المعنى الحقيقي اللي عايز يوصله، وعلمني إزاي أفهم المشهد من جوه الشخصية مش بالكلام المكتوب."
كما روت موقفًا مؤثرًا آخر أثناء تصوير أحد المشاهد قائلة: "في مرة كنت مش فاهمة المشهد وقلت له: أنا مش عارفة أعمل إيه؟ رد عليّ وقال: أنا مش عايزك إنتي اللي تنوريني، أنا عايز نور رباني. وبعد ما صورنا المشهد، لقيته قاعد لوحده ودمعة في عينه، وقال لي: ده مش دلع، أنا اتأثرت بجد."
واختتمت يسرا حديثها قائلة: "كان بيخليني أشارك في كل تفاصيل الشغل، حتى في الأمور الصغيرة جدًا، وكنت حاسة دايمًا إن الفيلم اللي بشتغل فيه معاه مكتوب لي أنا ومصنوع بروحنا سوا. يوسف شاهين كان بيملك طاقة ونور خاص بيعدي لكل اللي حواليه، وكان فعلاً بيصنع حالة فنية مش ممكن تتكرر."
وشهدت الندوة حضور عدد من النجوم وصناع السينما، من بينهم حسين فهمي، يسرا اللوزي، محمود حميدة، لبلبة، خالد يوسف، عمر عبد العزيز، رشا بن معاوية، محمد حفظي، روجينا، وخالد عبد الجليل، إلى جانب عدد كبير من ضيوف مهرجان الجونة السينمائي في دورته الثامنة.
