بقالنا كام يوم بنشوف فيديوهات غريبة جدًا لسواقين في حالة غير طبيعية بسبب شربهم خمور أو تعاطي مخدرات، لدرجة إن الناس بقت تعلق بسخرية وتقول: "واضح إن فيه صفقة مضروبة نزلت السوق والشمامين كلهم لبسوها."
سواق أوبر سكران طينة
أول الحوادث كان مع سواق تابع لشركة نقل ذكي، عميل لاحظ إنه مش متمالك أعصابه وداخل في دنيا تانية، وقف العربية وصوره ونزل الفيديو.
وزارة الداخلية أصدرت بيان وأكدت القبض على السواق (من المطرية)، ولما عملوله تحليل طلع متعاطي مخدرات. النيابة العامة حبسته 4 أيام على ذمة التحقيق لأنه عرّض حياة الناس للخطر.
أتوبيس نقل جماعي في المطرية
فيديو تاني انتشر لسواق أتوبيس في مساكن المسلة بالمطرية، شكله مش متزن خالص وبيسوق وهو سكران. الركاب وقفوه وصوروه وهو "مش دريان بحاجة".
وزارة الداخلية أعلنت لاحقًا ضبط الأتوبيس وسواقه (مقيم بالقليوبية)، واتضح كمان إنه سايق من غير رخصة، واعترف بتعاطي المخدرات. وتم التحفظ على الأتوبيس واتخاذ الإجراءات القانونية.
ست تركب توك توك وتكتشف الكارثة
الموقف الأغرب كان مع واحدة ست ركبت توك توك وسواقه شاب صغير. فجأة لاحظت إنه مش طبيعي وعمال يروح يمين وشمال بشكل خطير. الست ما استحملتش، راحت "راقعة بالصوت" ونزلت بسرعة قبل ما تحصل مصيبة أو يدخل في حد.
الست صورت فيديو وقالت: "كنت راكبة التوك توك وفجأة لقيته بيروح يمين وشمال، روحت مصوتة وقلت له نزلني، حرفيًا كنا هنتقلب."
مطالبات بحملة أمنية
الفيديوهات دي اتنشرت على نطاق واسع عبر السوشيال ميديا، والناس بدأت تربط إن معظم الحالات في المطرية، وطالبوا وزارة الداخلية بحملات موسعة ضد مروجي المخدرات وضبط السواقين المتعاطين، قبل ما تحصل كوارث أكبر تعرض حياة الركاب للخطر.
