كشفت الفنانة ياسمين الجيلاني عن تفاصيل سبب غيابها خلال السنوات الماضية عن الساحة الفنية، متحدثة أيضًا عن تشبيه الجمهور لها بالفنانة شريهان، خلال لقاء لها مع الإعلامية ياسمين عز في برنامج كلام الناس.
وقالت ياسمين الجيلاني: "كانوا فاكرين أن في حد منعني، وأنا مفيش حاجة تقدر توقفني إلا رغبتي الشخصية. أنا اخترت أني أقعد لأني رفضت حد يساعدني في تربية بنتي، وكنت حابة أحط التقاليد بتاعتنا وأتفرغ لها".
وأضافت أنها أرادت تعويض فقدانها لطفولتها بسبب غياب والدتها، قائلة: "لما كنت طفلة والدتي كانت مشغولة ومش موجودة معايا، وكنت بحس بالفقدان. قلت أنا مش هخلي بنتي تحس بنفس الإحساس ده، وبدأت أفكر أرجع للشغل وأمهد ده لها، إحنا أصحاب جدًا ونادرًا لما تقولي مامي، لازم أصاحبها وأقرب فكري من فكرها لأنها جيل مختلف تمامًا".
وتحدثت عن والدها الراحل قائلة: "والدي رحمة الله عليه كان منفصل عن والدتي ومكنش موجود في حياتي، لكن كان بيخليني أحس بالأمان. كان بيزورني وكنت بشوفه".
وعن تشبيهها بالفنانة شريهان، قالت: "اتقال لي كتير إني شبه شريهان، وجت عليا فترة غيرت من شكلي وشعري. أنا مبحبش حد يتشبه بحد لأن كده بسلب شخصيته، لكن دي حاجة بتسعدني جدًا، ومكانها محدش هياخده منها وهي جميلة".
