أحيت الفنانة رانيا فريد شوقي، الذكرى السنوية الثانية لرحيل شقيقتها ناهد، عبر منشور مؤثر على حسابها الرسمي بموقع فيسبوك، حيث شاركت صورًا تجمعها بالعائلة وعبّرت عن شعورها بالفقد والحنين.
كلمات رانيا عن الفقد والفراغ
كتبت رانيا فريد شوقي في منشورها: "النهاردة الذكرى السنوية التانية لوفاة أختي ناهد… الوقت بيجري بسرعة، والعُمر بيجري معاه. من بعد ناهد، اللمة بقت ناقصة… من ساعة مرضها كنا بنتجمع في المستشفى نحاول نقوّي بعض، وبعدها لما ماما تعبت وراحت، بقى في فراغ كبير محدش عرف يملّيه، كأن البيت فقد صوته واللمة فقدت دفها".
ذكريات الطفولة وعلاقة ناهد بعائلتها
وتابعت رانيا: "ناهد من صغرها اتربّت في حضن عمّاتي في بيت جدو، كانت بتحب المكان وناسه جدًا، وعمتي عواطف وناهد قصة حب، وأكيد بيت الجد والجدة كله دلع وحب… وهي اللي أطلقت على عمتي عواطف اسم 'طوفة العطوفة'".
وأضافت: "كنا بنتجمع دايمًا مرة كل شهر، وكل مرة في بيت حد مننا… كل ست كانت تطبخ صنف أو اتنين، لكن اللي كان يملأ البيت مش الأكل، كان الحب اللي اتربينا عليه وذكريات عن بابا ما كانتش بتخلص… حب العيلة اللي رغم أي خلاف يفضل هو السند والبركة والمعنى الحقيقي للدفا مهما اختلفنا".
مناسبات العائلة واللمة الدافئة
تطرقت رانيا أيضًا إلى الذكريات الرمضانية والعائلية قائلة: "في رمضان من أيام بابا، أول يوم كان 'فرض عيلة' مش عادة، العيلة كلها بالأولاد والأحفاد نتجمع من الفطار لغاية السحور… أحلى لمة، وأجمل عيلة وضحك من القلب ما يتعوضش… دلوقتي بقينا بنتقابل في المناسبات بس، وزي ما نكون خايفين نتجمع، خايفين اللمة تفكرنا مين ناقص ومين راح".
رسالة الختام والذكرى المستمرة
واختتمت رانيا منشورها: "بس جوا كل واحد فينا، اللمة دي لسه عايشة… صوت ناهد وضحكة ماما وصدى الأيام الحلوة اللي عمرها ما بترجع… الحمد لله على نعمة العيلة من ناحية بابا ومن ناحية ماما، وربنا يرحم ناهد وماما وأمواتنا جميعًا ويجمعنا بيهم في الجنة، ويظل بينا دايمًا حنين الأيام الحلوة ودفاها".
