وجه عصام الحضري، حارس مرمى منتخب مصر السابق، انتقادات نارية للاعب محمود تريزيجيه ولاعبي الدوري المصري، بسبب ما وصفه بـ"المبالغة غير المبررة" في الطلبات المالية، مؤكدًا أن الأداء داخل الملعب لا يوازي تلك الأرقام.
وقال الحضري خلال مداخلة ببرنامج "ملعب أون" المذاع عبر قناة "أون سبورت": "مفيش لاعب في مصر يساوي 10 ملايين جنيه.. أنا مش ضد إن اللاعب يفكر في الفلوس، لكن فين المردود؟ لازم تقدم حاجة تليق باللي بتطلبه."
وأضاف الحضري: "لازم اللاعب يحقق بطولات لناديه وللمنتخب، ولازم يكون فيه سقف للمطالب. نسمع عن لاعبين بيطلبوا 70 أو 80 مليون! ليه؟ هل علشان الدوري والكأس؟ إحنا بنتكلم عن مستوى تاني زي كأس العالم للأندية."
وتابع الحضري حديثه بتقييم مباشر لأبرز اللاعبين في السوق المصري قائلًا: "أغلى لاعب في مصر يساوي 15 مليون جنيه. محمد الشناوي يستحق 10 ملايين، إمام عاشور 15 مليونًا، وزيزو وتريزيجيه نفس القيمة."
وفي تعليقه على عودة تريزيجيه للأهلي رغم تقاضيه مبالغ كبرى في الخارج، قال الحضري: "هو كان بياخد فلوس كبيرة برا، بس هل حد ضربه على إيده عشان يرجع؟ هو اللي اختار."
واختتم الحضري رسالته بالتأكيد على أهمية ربط القيمة المالية بالعطاء داخل الملعب، مشيرًا إلى أن الوقت الحالي يتطلب واقعية وانضباطًا ماليًا يتماشى مع طبيعة الدوري المصري وتطلعات المنافسة القارية والدولية.
